სერ ალექს ფერგიუსონმა სთხოვა თავის მოწაფეებს “ვესთ ჰემის” დამარცხების შემდეგ შემოევლოთ წრე სტადიონისთვის, იმისათვის რომ გულშემატკივრებისთვის ამგვარად მადლობა გადაეხადათ.
“გულშემატკივარი დღესაც ჩინებული იყო, – უთხრა მან MUTV–ს. – ასე სტადიონს წრეს მხოლოდ მაშინ უვლიან, როდესაც ტიტულს იგებენ, მაგრამ ჩვენი გულშემატკივრები ამას იმსახურებენ”.
“ჩვენ ჩვენი ფანების გახარება იმიტომ გვინდოდა, რომ მთელი სეზონის განმავლობაში მხარში გვედგნენ. სამშაბათს საღამოს, “ბარსელონას” წინააღმდეგ გამართულ მატჩში ისინი ჩინებულად იქცეოდნენ. იმედი მაქვს, რომ მომავალ კვირას “იუგანთან” გასამართი თამაშის შემდეგ ყველანი გამარჯვებას ვიზეიმებთ”.
ფერგიუსონმა ფეხბურთელების პროფესიონალიზმი აღნიშნა, რომელიც გამოკივეთა, როდესაც ნანიმ ლუკას ნილის წინააღმდეგ უხეშად ითამაშა და გუნდი 10 კაცით დატოვა.
“თამაში ნანის ბავშვურმა ქცევამ გააფუჭა, – განაცხადა იუნაიტედის თავკაცმა. – მან მოწინააღმდეგეს უხეშად უპასუხა, ეს არ უნდა გაეკეთებინა, ამის შემდეგ მსაჯს უკვე სხვა გამოსავალი არ ჰქონდა და ის ლაისმენთან გასაუბრების შემდეგ გააძევა. მაგრამ მე დარწმუნებული ვარ, რომ ეს ნანისთვის კარგი გაკვეთილი იქნება”.
“დღეს უმნიშვნელოვანესი სამი ქულის მოპოვება იყო, – დაამატა სერ ალექსმა. – ამისათვის ჩვენ გარკვეული დაბრკოლებების გადალახვა მოგვიწია, მითუმეტეს მაშინ, როდესაც მათ გოლი გაიტანეს და ჩვენ ათნი დავრჩით”.
“პირველი ტაიმის ბოლო ჩვენთვის დაძაბული აღმოჩნდა, მაგრამ ანგარიშის შენარჩუნება მოვახერხეთ. შემდეგ ტაქტიკა შევცვალეთ, იმისათვის რომ მეორე ტაიმში ბურთის ფლობა გაგვეძლიერებინა. კონცენტრაციის შენარჩუნება შევძელით და მეოთხე გოლიც გავიტანეთ. ამის შემდეგ თამაში ჩვენთვის უკვე დასრულებული იყო”.